Амбасадар Беларусі пры Святым Троне ў Ватыкане і былы намеснік міністра замежных справаў Юрый Амбразевіч правёў непублічныя сустрэчы з шэрагам еўрапейскіх дыпламатаў. На іх ён спрабаваў «падаць сігнал», што Беларусь імкнецца выйсці з міжнароднай ізаляцыі, піша агенцтва Reuters са спасылкай на свае крыніцы. На думку аднаго з дыпламатаў, які сустрэўся з Амбразевічам, Мінск «адчувае акно магчымасцяў» на фоне пацяплення адносін з адміністрацыяй Дональда Трампа і хоча выкарыстаць гэты момант, каб дабіцца адмены санкцый. Ці ў курсе гэтых кантактаў Офіс Ціханоўскай? Пра гэта «Люстэрка» спытала ў дыпламатычнага дарадцы лідаркі дэмсіл Дзяніса Кучынскага.
— Так, мы ведаем пра гэтыя кантакты. Дыпламаты розных краін, у тым ліку ў Парыжы, звярталіся да Ціханоўскай з нагоды гэтых нядаўніх захадаў з боку Амбразевіча, — расказаў Дзяніс Кучынскі. — Прэзідэнтка сказала, што ў прынцыпе не супраць, калі нехта з супрацоўнікаў амбасадаў, на ніжэйшым узроўні, сустрэнецца з Амбразевічам у Парыжы. Яна таксама папрасіла нашых партнёраў трансляваць агульнаеўрапейскую павестку ў дачыненні да рэжыму: што ўсе палітвязні мусяць быць вызваленыя, а рэпрэсіі — спыніцца.
Нагадаем, у верасні амбасада Беларусі ў Парыжы разаслала еўрапейскім місіям запрашэнні сустрэцца з Юрыем Амбразевічам. У лісце гаварылася, што гэты дыпламат «неафіцыйна адказвае за каардынацыю дыпламатычных кантактаў Беларусі ў сталіцах Заходняй Еўропы» і гатовы правесці сустрэчы 6, 8 ці 9 кастрычніка. Беларускі бок патлумачыў запыты на такія сустрэчы «стандартнай дыпламатычнай практыкай». Аднак, як удакладнілі тры крыніцы ў еўрапейскіх дыпмісіях, запрашэнні атрымалі далёка не ўсе краіны, і толькі некаторыя з іх пагадзіліся на перамовы з Амбразевічам.
Паводле іх, падчас гутаркі ён спрабаваў «перадаць сігнал», што Беларусь імкнецца выйсці з міжнароднай ізаляцыі і гатовая граць ролю пасярэдніка — як ва ўрэгуляванні канфлікту паміж Расіяй і Украінай, так і ў будучых перамовах па пытаннях агульнаеўрапейскай бяспекі.
Тым не менш спробы Мінска спадабацца еўрапейскім краінам выклікаюць у ЕС насцярожанасць, адзначае Reuters. Двое дыпламатаў назвалі дзеянні беларускіх уладаў чарговай спробай «піяр-атакі», закліканай паказаць, што Беларусь нібыта не цалкам падпарадкоўваецца Маскве.
«Яны (беларускія ўлады. — Заўв. рэд.) сцвярджаюць, што не хочуць эскалацыі канфлікту, і імкнуцца падкрэсліць, што ў іх свая пазіцыя, адрозная ад расійскай», — расказаў адзін з суразмоўцаў агенцтва.