У Беларусі захоўваецца дэфіцыт кадраў. Сярод іншага ў цэлым па краіне не хапае больш чым 500 настаўнікаў. Паглядзелі, колькі гатовыя плаціць педагогам.
Якія заробкі ў вакансіях для настаўнікаў
Адукацыя аказалася адной са сфер, у якіх не хапае работнікаў. У рэспубліканскай базе вакансій на 17 кастрычніка было размешчана 513 прапановаў працы для настаўнікаў. Але ў асноўным гэта прадметнікі ці педагогі пачатковай школы. Але ёсць і прапанова, да прыкладу, для дэфектолага. Дэфіцыт гэтых кадраў адчуваецца ў тым ліку ў Мінску і Брэсцкай вобласці.
Самую высокую зарплату такім спецыялістам прапануюць у нацыянальным дзіцячым адукацыйна-аздараўленчым цэнтры «Зубраня». Гэта ад 2 да 2,2 тыс. рублёў (тут і далей сумы, хутчэй за ўсё, да выплаты падаткаў). Там шукаюць настаўніка матэматыкі з вышэйшай профільнай адукацыяй. Наймальнік гатовы даць пакой у інтэрнаце.
Аплата па гэтай вакансіі на 562 рублі меншая, чым сярэдняя зарплата ў Беларусі ў жніўні гэтага года. Аднак па іншых яна яшчэ ніжэйшая.
У Мінскае дзяржаўнае абласное вучылішча алімпійскага рэзерву патрэбны выкладчык фізікі. «Адсутнасць патрабаванняў да стажу і наяўнасці кваліфікацыйнай катэгорыі», — гаворыцца ў аб’яве. Плаціць гатовыя 2 тыс. рублёў за месяц, таксама магчымыя дадатковыя аплатныя стымулявальныя і падтрымлівальныя гадзіны і класнае кіраўніцтва, за якое, як правіла, таксама ёсць даплаты.
Амаль такі ж заробак будзе мець настаўнік беларускай мовы і літаратуры ў гімназіі № 5 Віцебска — ад 1,9 да 2 тыс. рублёў. У адной са школ Бабруйска такому ж педагогу прапануюць 1,3−2 тыс. рублёў. Папярэдні падбор кандыдатаў там быў запланаваны на 1 верасня. Але, відаць, на месца нікога не знайшлі, бо вакансію абнавілі 16 кастрычніка.
А вось у сярэдняй школе № 4 Віцебска настаўніку матэматыкі з вышэйшай адукацыяй прапануюць ад 1 да 1,2 тыс. Удакладняецца, што магчымыя прэміі і надбаўкі.
Гімназіі № 7 Гродна патрэбны выкладчык матэматыкі. З патрабаванняў — толькі вышэйшая адукацыя. Плаціць там гатовыя 1−1,5 тыс. рублёў.
У сярэдняй школе № 12 Маладзечна патрабуецца адразу некалькі работнікаў на поўную стаўку. Гэта чнастаўнік пачатковых класаў, рускай мовы і літаратуры, а таксама матэматыкі. Трэба, каб кандыдаты былі з вышэйшай адукацыяй. Пры гэтым усе яны могуць разлічваць на заробак у 1 тыс. рублёў.
Даходы настаўнікаў моцна недацягваюць да сярэдніх па краіне
Традыцыйна заробкі ў бюджэтнай сферы ў Беларусі ніжэйшыя, чым у сярэднім па эканоміцы. Апошнім часам яны не дацягвалі да 80% ад усярэдненага паказчыка па краіне.
Аднак у адукацыі гэты разрыў яшчэ большы. Паводле звестак Белстата, у студзені — жніўні сярэдні заробак у гэтай галіне быў 1 843,4 рубля, у той час як сярэдні заробак ва ўсёй эканоміцы быў 2 624,1 рубля. Выходзіць, што ў гэтай сферы ён склаў 70,3% ад сярэдняга. І гэта з улікам усіх работнікаў, уключаючы дырэктараў адукацыйных установаў і чыноўнікаў галіны. Хутчэй за ўсё, у настаўнікаў узровень даходаў яшчэ больш недацягвае да сярэдняга паказчыка.
Чытайце таксама
